Comité científicu del [ARLAS]
L'Archivu de la Represión Llingüística del asturianu [ARLAS] ye un proyectu encontáu na investigación académica. Col envís de mirar pola rigurosidá del so conteníu y la correcta interpretación de los datos conformóse un comité científicu del que formen parte por persones del ámbitu académicu y de distintes procedencies.
Dr. Inaciu Galán
Director del [ARLAS]
Academia de la Llingua Asturiana
Doctoráu pola Universidá d’Uviéu cola tesis “La llingua asturiana nel Franquismu”, ye miembru de númberu de l’Academia de la Llingua Asturiana. Participa en numberoses iniciatives en defensa del asturianu y la diversidá llingüística. Nel so llabor nel ámbitu audiovisual firmó dellos documentales centraos na cuestión llingüística asturiana.
💻 www.inaciugalan.com
📩 corréu
Dra. Claudia Elena Menéndez Fernández
Universidá d'Uviéu
Profesora del Departamentu de Filoloxía Clásica y Románica de la Universidá d'Uviéu, doctoróse cola tesis "El sistema de denominación de los neños abandonaos n'asturies". Tien asoleyaos artículos en revistes y volúmenes colectivos, trabayando tamién nel ámbitu de la reividicación y la difusión del asturianu. Ye vicepresidenta d'Iniciativa pol Asturianu.
Dra. Covadonga Lamar Prieto
University of California-Riverside
Trabaya de profesora titular na Universidá de California Riverside. Doctoróse en Filoloxía (2007), en Llingüística (2012) ya en Historia y Estudios Socioculturales (2019). Ye la presidenta d’Asturian Studies, un grupu multidisciplinar de persones que sofiten el campu de los estudios sobro Asturies internacionalmente. Interésen-y les producciones culturales de la primer xeneración tres d’una crisis política o social, y cómo esa xente discurre pa imaxinar, dafechu, esi mundu nuevu. Tienlo estudiao nel Méxicu del sieglu XVI, na California de los sieglos XVIII-XIX y na Asturies del XIX.
Dr. Avelino Corral Esteban
Universidad Autónoma de Madrid
Profesor Contratáu Doctor, acreitáu como Profesor Titular, na Universidad Autónoma de Madrid. Imparte cursos de sintaxis, semántica y pragmática del inglés mesmo a nivel de Grau como de Posgrado. Ye Doctor pola UNED, Llicenciáu en Filoloxía Inglesa pola Universidad Autónoma de Madrid y Llicenciáu en Filoloxía Alemana pola Universidad Complutense de Madrid. Les sos principales árees d’investigación cubren la interacción ente la sintaxis, la semántica y la pragmática, especialmente nes llingües natives americanes, romances, celtes y xermániques. Dende va siete años lidera’l Proyectu Honóxease, que’l so oxetivu ye fomentar la preservación y revitalización de la llingua cheyenne, llingua algonquina falada en Montana y Oklahoma nos Estaos Xuníos.
Dra. Isabel Álvarez Sancho
Oklahoma State University
Profesora titular nel Departamentu de Llingües y Lliteratures de la Universidá Estatal d’Oklahoma y doctora pola Universidá Estatal de Míchigan n'Estudios Culturales Hispánicos. Les sos árees d’investigación van dende la lliteratura del exiliu dempués de la guerra civil española al cine del sieglu XXI y la música y lliteratura asturianes contemporánees. Dende 2021 ye vicepresidenta del grupu d'investigación Asturian Studies.
Miriam Villazón Valbuena
University of California-Riverside
Miriam Villazón Valbuena ye estudiante de doctoráu na Universidá de California, Riverside. Les sos árees d’investigación son l'usu de llingües minorizaes nes redes sociales, y les característiques sociollingüistes de la diáspora. Ye la encargada de les rellaciones internacionales n'Asturian Studies y dende va dos años entama la serie de talleres Asturianu 101, onde académicos y persones del mundo de la cultura formen alderiques pa falar sobre asuntos académicos y culturales rellacionaos col asturianu.
Iván Llera Huerta
Presidente d'Iniciativa pol Asturianu
Llicenciáu en Comunicación Audiovisual pola pola Universidá Carlos III de Madrid y Máster en Periodismu Multimedia pola UPV/EHU, tien una llarga esperiencia nel ámbitu de los medios de comunicación. Activista en defensa de la llingua asturiana ye presidente de la ONG Iniciativa pol Asturianu dende 2019, dende la que vien trabayando distintes iniciatives nel ámbitu de la reivindicación y la normalización del idioma. Ye miembru del Conseyu Asesor de Normalización Llingüística de Xixón y del Conseyu Asesor de Política Llingüística del Gobiernu d'Asturies.
Lluis Fanjul Quelle
Responsable de producción audiovisual del [ARLAS]
Cuatro Gotes Producciones
Técnicu Superior en Realización d’Audiovisuales pol CIDISI RTV y Técnicu Superior n’Imaxe pol CIFP CISLAN de Llangréu. Tamién ta formáu en diseñu gráficu pola COE. Participó na realización de dellos documentales, de proyectos como Alderiques d’Asturies y, dende 2017, ye parte de Cuatro Gotes Producciones, onde trabaya n'estremaos proyectos audiovisuales como los documentales "No se dice 'ye', se dice 'es'" y "Elles, muyeres na lliteratura asturiana", o la plataforma de youtubers n'asturianu PlayPresta.
Reconstruyimos la hestoria de la represión sobre l'asturianu.
Necesitamos su consentimiento para cargar las traducciones
Utilizamos un servicio de terceros para traducir el contenido del sitio web que puede recopilar datos sobre su actividad. Por favor, revise los detalles y acepte el servicio para ver las traducciones.